Ka Pahsyntiew

Ha sngap 'lok tang shikyntien kwai, lyngba i sur jingrwai,

Ngan 'thuh-ngan tang kumba la jia mynshuwa ha krem Marai;

Ka khanatang b'la ju ïathuh naduh hyndai-hynthai,

Ka khana ba kynja maïa, ym kum puriskam-kai.

Napoh kata ka krem ïongngit ju mih ka 'thei samla,

Ba kup-ba sem da khor-da khriam ba ishongkun-shongkhia.

Dei ha kata ka por, ki ong, pur sted ka hamsaïa,

Na ki khynnah sharai masi ba ju ïohi ïa ka.

"Horkit-hordang! Wat leit jngoh ho!” kiba sngewphieng ki ong,

“Jahare! Peit ïoh dei ka ksuid ban pynthut te ym long”.

Don ba kylli para maki ha man ki dong-ki shnong:

"Hato ka lah ban dei ka khun marwei u 'lei Shillong?"

Napdeng ki jaitbynriew n'u Blei, tang Sati Mylliemngap,

U 'rangsamla na shnong Nongkseh, jingshisha u kwah lap.

Wut-wut u her-u suh kum khnam, u prong ki khlaw-ki btap,

Ban 'i ïaka um don jingma ïa ka jingtieng-jingïap.

Tang mar ïapoi hakhmat ka krem, u shem kumba khana,

Hangta riehtngen ka 'thei samla ba i dondur shisha.

U kaweh la ki kti sha ka ryngkat ka khot-pyrta;

Ka pat kam thie kam peit sha u, ka leh kum bym salia.

Imat la dei ka bok-nusib kha bha sngi la ka kmie;

Da shisong ki 'tiew jalyngkteng ïa ka u pynthame.

Ka pat ka tang shu 'i ïaki la kti ka sdang tare,

Khyndiat-pa-khyndiat na la krem ka sdang ïai mih ruh de.

Haba la poi ha ka jaka ba kham pajih na krem,

U Sati, briew babun ka buit, kynsan ïaka u kem.

U wanlam bran-bran sha la ïing, ka shnong baroh ka thnem,

Tang ban ïoh peit ïa 'riewphylla b'u Sati keiñ u shem.

“Sha krem Marai leit buh ïaka”, baroh ki ïa maham,

“Ïoh ba sngewsih ki blei-ki dkhen, kin pynhap da ka khlam”.

“Ïaka ngan sumar-ngan sukher, da ka akor ba tam”,

Sati u pynphai ktien ïa ki, ym don ba nud saham.

U Sati bad ka ‘thei samla ki sdang ïajuh-ïajan,

Ynda dap katto-katne por ki la poikha-poiman,

Na ki la mih khunblei-khunsyiem ba la pynheh-pynsan,

B'la burom da u luk-u lak, ki kynrem-ki lyndan.

Kyndit tang hadien khyndiat por ka phet sha krem Marai,

“Balei baieid phi ieh ïa nga?”, Sati u pan jingshai.

Ki khun ki leit ban ud-ban nam, “ko Mei na ngi wat jngai”,

Hynrei kata ka ‘riewphylla sha ki kam treh leit phai

Ka khanatang ka sah-ka neh ha ngi ka jaitbynriew

Ym don ba tip-ba ïohi shuh ïa ka kynthei bhabriew.

Tangba kyrteng jong ka sah pateng-pateng bynriew,

Salonsar ngi ïa tip baroh da ka 'thei "Pahsyntiew".